• 

學術時間：今時今日點解咁多三高盛女？可能同社會發展有關。眾所鳩知家下香港係知識型與服務型經濟，溝通與語文能力較強的女士自然會較為著數；加上2002年中學學位分配辦法採取男女合併派位模式，由於女生讀書較叻，好多Band 1中學男女校都係女多男少，大學好多傳統男多女少的學系如工程或電腦之類都開始越來越多女生，學歷好自然事業發展較好，導致三高女士越來越多。

一句講晒，家陣女人大晒！

係我相睇經驗之中，女強人多的是，呢位女強人A特別強。睇佢咭片，原來係某大跨國集團的高層之中的高層，全個集團得一個人指唔郁嗰隻，你話幾厲害。A未夠40歲就做到咁高層，咩原因真係唔知，可能同佢係內地長大同讀書有關啩。

老老豆豆，我只係市井流氓出身，對生活甚至飲食都求求其其，做咗十幾年記者同同兼職領隊，慣咗填飽個肚就去做嘢，啲嘢根本唔知味道，直頭好似倒落去咁，難怪搞到咁肥。

講番A，第一次見佢，睇佢啲衫都知唔少嘢，相反我啲就平到就皺到唔駛恨，分分鐘佢下屬個下屬個下屬都光鮮過我。傾偈時，查實都唔多算啱傾，例如傾去旅行，佢話剛剛去完拉斯維加斯，去睇唔駛乜鬼音樂劇，恕小弟家貧亦未有咁的品味，唔知係乜亦無本事去。就算係香港，佢都話睇過一套好好睇的音樂劇，係以龔如心事跡改篇的，我好似聽過但真係未睇過。

自備茶葉　手袋貴過我月薪

A做到咁高層，成日都唔係香港，有時what’s app大半日先覆。但又奇怪喎，我同A雖然的生活雖然係天與海，但又會約到幾次飯又睇過幾次戲，難得佢又有興致應酬我。有次A帶我去某間泰式餐廳食飯，間餐廳我當然未去過，裝潢異常高貴，啱晒佢身份，同我就格格不入。

食幾錢唔記得了，應該係好幾十碟快餐店碟頭飯的價錢。

又有次我話去打邊爐，銅鑼灣中中哋價錢嗰啲，我本來以為唔啱A身份，A嚟到都面口都唔算太難睇，但話拿咗幾包英國紅茶茶葉嚟同我嘆茶，隨即叫伙記埋嚟：

「同我用呢啲茶葉沖一壺茶嚟！」係用命令式的語氣，相信平時佢係公司對住下屬都係用呢種語氣，特別係男下屬。

本來我以為一間普通過普通的火煱店，點會咁順攤幫佢沖。但唔知係咪Ａ太似佢哋廚房大家姐之類，個位伙記哥居然十分樂意就沖咗壺茶出嚟。據A所講，呢隻茶葉經過多重泡製，所以茶味異常香濃。可惜小弟真係唔識欣賞，我覺得同平時係茶餐廳飲開嗰啲茶膽沖出嚟的，無乜太大分別，只係張包裝紙設計得比較靚之外。

打邊爐時，我盡量叫啲素菜嚟食費事食咁多肉，例如蘿蔔或菇菌類等，但A一塊都唔食，佢話呢啲材料唔知係邊度得來，會食壞人咁話。

打完邊爐之後去H & M，本來A話買啲新衫俾我，十成係見到我啲衫Cheap得滯啦，我話明唔好。

唔係怕唔好意思，亦唔係因為我唔貪心，只係怕H & M啲衫無我size咋！我多口問咗A個手袋幾多錢，佢話好平！有幾平？

「係法國買，$28,000咋，係香港買要成$38,000，係法國買抵好多！」我用嗰啲背囊都係$300幾蚊，我仲要用到條帶斷咗先捨得買第二個。當時我一個月收入都參唔多係咁多咋，如果買咗個手袋嗰個月咪唔駛食飯！

可想而知，A每個月閒閒地十幾廿皮落樓。

「做唔到嘢就炒！」　絕塵而去

好幾次食完飯後A都話去睇場戲。唔只一次坐低咗我話去廁所，番到嚟之後兩個位中間個手柄拉居然拉起咗，我明明記得個手柄本身係放低咗架喎。

A耐唔中會話我知工作上的事情，有次佢話嗰日剛剛炒咗幾個人，原因係工作無表現，「做唔到嘢就炒！」絕對唔可以留係度阻度工作進度同公司發展。

女強人得幾緊要。

最後一次食飯時，我透露過俾Ａ知我準備辭咗馬會份工創業。A勸我唔好，佢講咗個理由，係話美國聯儲局啲息好低，導致香港銀行唔肯貸款，營商環境好差之類，總之我做過財經記者，亦曾係專責寫貸款的記者好多年，都唔係好明佢意思，總之佢話打工點都好過創業。

如果做到佢咁高級，咁當然打工好過創業幾十倍。同晚食完飯佢又話去睇戲，但我睇過手機App，附近戲院套套戲都無乜飛剩，可能因為咁A即刻話要走，就走咗去，望都無望過我一吓就消失於人群之中，差幾條街就到佢屋企都唔俾我送埋。

「做唔到嘢就炒！」唔止係對下屬，對搵伴侶都應該適用。

文：麥耀邦 James Mak

（本文節錄自《毒男相睇真人騷　有一種幸福叫主動》）

《毒男相睇真人騷 有一種幸福叫主動》

出版社：筆求人工作室
作者：麥耀邦 James Mak
定價：HK$88
國際書號：978-988-74119-3-2
出版日期：2020年 1  月
圖書分類：流行讀物 / 兩性關係
本書於各大書局有售。如讀者尋書不獲，敬請向店員查詢。