文：周子峰（ 表面的正職是傳媒人，實際是全職的網絡怪，也是忿怒青／中年。《吵架辭典　實用罵戰心理學》作者。筆求人特約作者。 ）

就「敬黑死全家」這口號，個人是不敢亂叫的。
詛咒好很邪，我信嘅。

這幾個月，我做了以下措施:

由於不肯定「全家」的定義是直系親屬抑或包含親戚的「大家族」，向來唔多理會姨媽姑姐的我，勁煩咁追問阿媽有冇疏堂阿哥表乜表物之類係當差的。

老媽諗來諗去，好似唔多覺，仲問我做乜咁緊張。

我話：冇，有高人落「敬黑」降頭，呢種降會連累有血緣關係的人，我驚領嘢自己唔知啫。
老人家好信邪：啋大吉利是，乜當差咁牙煙架。
我話：多行不義，招惹鬼神，冇辦法啦。

我不敢說這叫連累無辜，因為根據網上說法，敬黑及其親人「沒有一個是無辜的」。我係度諗，如果我有家人係敬黑，我登報脫離關係，是否可以逃過詛咒呢？

親戚，clear。但仲未放心。

於是，我迫問老竇外面有冇私生子。

老父：仆街仔冇大冇細問埋老竇啲咁嘅嘢。
我：一家大細條命喺你手呀，人命關天，你咪學柒婆迴避問題，快啲從實招來！
佢死都話冇，一邊小柒我痴線。
我話：嗱你喺外面有冇搞三搞四我唔理，但如果你真係生落幾件，千祈唔好俾佢當差呀，會好大鑊，冚家鏟架，你明唔L明呀？

私生兄弟姐妹，clear。但仲未放心。

我擔心我自己。於是，我搵番廿年冇見的ex。

ex：做乜無端端搵我，想借錢定賣保險？
我：打擾你生活唔好意思。我想問……當年我有冇做出啲人神共憤傷害咗你嘅事，例如……分手前唔覺意中出咗，搞大咗又走咗去？
ex笑出嚟：痴痴地。你雖然係廢青，都唔算係渣男。如果你真係中出即飛，我實會落咗佢。做咩，你信咗邪教？
我放了一大半心，不過做人最緊要謹慎，便問：聽講你好似生咗個仔，唔知似你定似你老公呢哈哈……係呢，佢考唔考到入大學，唔使讀毅進啩？

私生子，clear！

經過一番努力，我終於成就解鎖，有條件嗌敬黑死全家了。

呢份成就感，我唔知人地，自己就好鬼自豪架。

#聽故咪駁故

#咪理曲定直

周子峰facebook：

https://www.facebook.com/writerCTF

請支持筆求人出品

《獵巫武者 罪與罰的黑炎》港產武俠不死。武道高手vs異能巫師大激戰。
《穿越偉人夢 大探險家哥倫布篇》兒童故事，主角穿越15世紀，與偉人哥倫布一同海上冒險。
《通靈咒怨》學生連環死亡，重現大學校園的恐佈傳說。
《深層揭密 神秘學事典》「無奇不有」神秘傳說終極破解。