[微小說] 214,我愛妳!

出發前,我都係決定除低條螢光領呔,因為今次係晚間行動,耀眼嘅光芒始終唔係咁適合。都係揀返套深色西裝,格仔裇衫,襯條淨色領呔比較穩陣 ── 因為咁樣係佢最喜愛嘅配搭。

今晚,我一如往日般節儉,選擇乘搭小巴赴約。但係點解車上面嘅人都以奇怪嘅眼光望住我?部份更掩住嘴笑?我偷偷地檢查自己,到底有乜嘢唔妥。件西裝穿咗窿?冇呀。火車未到站?都冇。唔通着咗拖鞋出街?唔係吖。係咪仲有剃鬚膏黐喺塊面度呀?冇喎。一切正常過正常,於是我放心繼續攬住嗰束一共有99枝嘅火鑽玫瑰,坐小巴直飛餐廳。

2月14日情人節 ── 全球男人嘅大災難,但我偏卻選擇喺呢日,預先買定鮮花及鑽石戒指,約好佢晚上七點喺某高級餐廳共晉晚餐,同時進行我部署多時嘅求婚計劃。為求一擊即中,我連日來與餐廳嘅職員不斷聯絡,皆因今次求婚嘅每個細節均由我親自策劃。正因為我要求多,為免出錯,我曾經要求餐廳侍應充當臨時演員,可惜遭到拒絕。唯有退而求其次,變陣將過程簡化,實行速戰速決!

晚上六點幾,我已率先抵達餐廳作準備,製作所需道具。半粒鐘後,一切準備就緒,計劃進入倒數階段……

佢盛裝準時抵達餐廳,紅粉菲菲,心情靚爆。我哋好開心咁一齊享用嗰個有6道菜嘅晚餐。一路食,我一路遏止住緊張嘅心情,等待著吃甜品時嘅最佳時機!

好不容易才吃完個main course。酒過三巡,佢面泛紅霞,顯得格外迷人。我凝望住佢,佢有啲唔自然,睇得出佢腦內的多巴胺正急速飆升!

我乘勝追擊,用一個情深款款嘅眼神問:「我可以錫你嗎?」佢心跳如鼓,怕羞地點一點頭。我於是錫咗佢緋紅嘅面頰一下,感覺到佢成個人震咗一震。

之後侍應傳上甜品,佢極度興奮,因佢最愛吃呢度嘅home-made dessert。係時候嘞!我向侍應打咗個眼色,佢即時會意,神神秘秘咁向佢遞上一部手提電話。

佢先係一愕,然後看見電話螢幕閃亮着一個「按我啦!」嘅emoji圖案,向我拋了個媚眼,伸手一按。赫然全場燈光轉暗,餐廳stage上面嘅diamond screen出現咗我同佢嘅合照,襯托着羅家英名曲《我向妳求婚》,並彈出「我求妳應呀承?」字樣。

佢仲未來得及反應,我已跪下遞上戒指說:「嫁畀我吖,老婆!」就喺呢個magic moment,侍應再送上嗰束紅玫瑰,並在旁鼓掌。佢非常感動,眼淚盈眶,隨即輕輕點頭,我高興萬分,為佢戴上戒指,同時獻上情深一吻。

目睹此情此境,部份餐廳顧客雖掩着嘴爆笑,亦加入拍手,為我打氣,一時間我同佢成為咗全場嘅焦點。

佢笑靨如花,仲記得送我情人節禮物。我撕開禮物盒嘅花紙,原來係一隻我心儀已久嘅名貴手錶。我即時戴上,拉出錶嘅鏈制,將時針撥至八點,對住佢講:「我要永遠留住呢一刻!」佢再一次被我嘅「王家衛式肉麻」感動得眼眶通紅。

求婚計劃終於完成,一切順利得很。點知後來佢同我講:「估唔到你會喺嗰晚玩求婚,真係好surprise,但係我其實唔想畀咁多人望住,好鬼尷尬啊!如果你能夠喺另一個少啲人嘅地方再求一次,我會覺得perfect!」

文:塵文吹 (正職營銷,兼職寫字,字作自樂。筆求人工作室特約作者。)

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s

This site uses Akismet to reduce spam. Learn how your comment data is processed.